【台灣、宜蘭、花蓮、台東、高雄】[2014 不一樣的7天自駕親子遊]Day 1 2之1 香港去台北(商務位)、宜蘭大湖風景遊樂區找<睡天使醒惡魔>台灣朋友

台灣朋友大合照

香港人經常去台灣玩，但可能一般的台灣景點都去過了：台北已經去到爛、台中清境都玩埋，就連比高雄更南的南台灣「墾丁」都去過了，所以繼續發掘更多新景點，就會諗到台灣的東岸，如宜蘭、花蓮、台東一帶，再加上玩在暑假香港有直航航班飛去台東（2015/2016年曾開辦)，以及今年2017飛往花蓮，看來台灣東部都會慢慢成為香港人去玩的熱點。

旅行，每人都為自己計劃一些目標，例如想看到甚麼、或者體會甚麼。今次，瞳瞳爸爸希望可以來一個台灣環島旅行，經過瞳瞳兩次去台灣經驗之後，就來一個台北玩到高雄的行程，用「舊方法」 - 自駕遊，自己揸私家車由台北出發，走台灣的東岸：經過宜蘭、花蓮、台東抵達高雄，沿途玩下、停下、住下、食下，盡量減少長途車程，又可以感受一下好山好水。今次的行程就好似上圖藍色線咁，一路由北到南玩落去，好啦！我地開始出發啦！

今次行程，就由台北宜蘭、花蓮、台東抵達高雄咁玩落去

我地今次搭CI2678 0810 香港去台北的飛機，希望爭取時間去玩，不過代價就係0600要到機場check in。我地前一晚先執好行李，瞓幾個鐘又出發了，天都未光，唯有自己揸車出機場，好彩有朋友幫手，幫我揸走架車，唔該基叔，哈！ 

朋友幫忙合照， 謝謝！

一埋去check in櫃位

職員：「吳生, 唔好意思, 今日班機好FULL」

我：「係...」(心諗: 咁點樣呀??)

職員：「我UPGRADE你地去商務位, 唔知有無問題?」

我：「OK!」(心裡暗暗YES左幾次, 但又要保持冷靜)

一般航空公司好少會upgrade家庭上商務位，因為怕小朋友騷擾真正商務客

yeah! 商務位呀!

瞳瞳一家都係第一次坐商務位，一個新體驗：商務位待遇當然唔同啦！一坐低，空姐就奉上Welcome drink 同nuts，仲有會稱呼你的姓氏，好受尊重。商務位坐位唔多，大約可以坐15位乘客左右。

飲杯!

空姐仲主動派畫冊比瞳瞳, 今次係Thomas

今次係瞳瞳第3次坐飛機, 對設備已經駕輕就熟, 識得叫媽媽開歌仔聽

好陶醉咁......

...........喂喂!! 原來真係瞓著左呀!!!zzzzzzzzzzzzzzzzzzzzzzzzzz因為太早起身~

我地今次航程的餐牌

真係好豐富啊!! 第一次食飛機餐可以飽肚, 而且味道真係唔錯, 炒蛋好滑~

去到台北，我地怱怱忙忙開電話卡、提款、搭的士到「格上」辦手續拎車，今次因為太多人租車，時間有點忱誤，取車以為全力開去宜蘭大湖風景遊樂區，因為有班<睡天使醒惡魔>台灣朋友等著我們呢！我們經過台灣第一、全世界第五長的「雪山隧道」，隧道一出就是宜蘭縣。

今次租的車：TOYOTA VIOS。好舒服，最重要係有一個USB頭，可以比我在長途之中聽音樂，唔會瞌眼瞓。

台北就只見到圓山大飯店，就要趕去宜蘭了

準備入「雪山隧道」

到達目的地－「宜蘭大湖風景遊樂區」。大湖風景遊樂區以大湖為中心，面積廣達數十公頃，建有停車場、水上餐廳、拱橋、觀光果園、水上咖啡屋、水踏船、竹筏、環湖賞景步道及碼頭區等多種設施，夏季並提供泛舟遊湖的水上活動。大湖更是雁鴨、水鳥等候鳥的棲息地，還有許多動物的生態天堂，例如黑天鵝、綠頭鴨、小水鴨等。

我們下車後，先帶到這排水上屋用午膳，第一次真人面對面見到，還有一班熱情的台灣朋友唱歌歡迎我們，十分熱情，我地受寵若驚，我們一家永遠會記住這一幕，多謝你們啊！=)

<睡天使醒惡魔>台灣朋友都是一班爸爸媽媽，帶小孩去不同地方玩，有時候我也會參考他們的行程呢：http://naughtyangel.pixnet.net/blog

呢度大家當係一個農莊咁玩，我地都好開心可以同一班台灣朋友咁玩，可以知道一下平常佢地會帶小朋友玩什麼。

吃過中午飯後，我們開始活動：第一個是DIY匙扣同口罩，場內有導師教大家去做。

之後我地一家穿救生衣去遊船(規定)。嘩！真的好熱！無辦法了，安全起見嘛。個湖好大，所以亦都有好大地方比我地踩，久唔久湖中仲會出現不知名的水鴨添～

上岸之後，我地一班人就去釣魚。但我地兩公婆都唔識釣魚，所找大家找來一位爸爸教我地，好好人啊！佢好細心的教我地，可惜我覺得我們在浪費，好像餵魚中，次次魚餌都被食了，哈！但我見大家都有收鑊呀～

柱上面的係魚餌

釣魚過後, 又有節目安排, 出發去摸蜆要去到另一邊，兩邊田地都好靚，沿途有導遊小姐講解。到達摸蜆的地方後，大家都二話不說脫褲子落水，他們動作真快！我們的收穫卻是螺，玩得好開心，連瞳瞳都落水摸呢，活動完結後，大家把撈到的都放回水中..

我們的收鑊

與「睡天使、醒惡魔」一眾朋友合照, YEAH, 玩得好開心呢~

瞳瞳不捨得大家呢.......

玩完之後，差不多日落，要和台灣朋友bye bye啦！我們要去羅東市的民宿check in，瞳瞳不捨得大家呢....

有用資料: 

1. 格上租車

電話：0800-222-568

網頁：https://www.car-plus.com.tw/

2. 宜蘭大湖風景遊樂區

地址：宜蘭縣員山鄉湖前路185號

電話：+886 3 922 8080

網頁：https://www.facebook.com/f039220561/

3. 睡天使醒惡魔

網頁：http://naughtyangel.pixnet.net/blog

延伸閱讀：

[2014 不一樣的宜蘭、花蓮、台東、高雄7天自駕親子遊]Day 1 2之2 羅東戀館民宿、羅東夜市

http://tungbama.blogspot.hk/2017/07/2014-7day-1-22.html

[2014 不一樣的宜蘭、花蓮、台東、高雄7天自駕親子遊]Day 1 2之1 香港去台北(商務位)、宜蘭大湖風景遊樂區找<睡天使醒惡魔>台灣朋友

http://tungbama.blogspot.hk/2017/07/2014-7day-1-21.html

[2014 不一樣的宜蘭、花蓮、台東、高雄7天自駕親子遊]Day 2 2之1 崔記早點(宜蘭)、幾米廣場(宜蘭)、菓風工房(宜蘭)

http://tungbama.blogspot.hk/2017/07/2014-7day-2-21.html

[2014 不一樣的宜蘭、花蓮、台東、高雄7天自駕親子遊]Day 2 2之2 豆腐岬17 午餐(蘇澳)＞南方澳漁港(蘇澳)＞南方澳觀景台(蘇澳)＞花蓮自強夜市

http://tungbama.blogspot.hk/2017/07/2014-7day-2-22-17.html

[花蓮酒店推介][2014 不一樣的宜蘭、花蓮、台東、高雄7天自駕親子遊]270度無敵海景 - 海中天會館http://tungbama.blogspot.hk/2017/07/270.html

[2014 不一樣的宜蘭、花蓮、台東、高雄7天自駕親子遊]Day 3 花蓮遠雄海洋公園

http://tungbama.blogspot.hk/2017/07/2014-7day-3.html

[2014 不一樣的宜蘭、花蓮、台東、高雄7天自駕親子遊]Day 4 3之1 台灣靚米之鄉：池上鄉、尋找金城武的「伯朗大道」、食池上米「碗公餐」

http://tungbama.blogspot.hk/2017/07/2014-7day-4-31.html

[2014 不一樣的宜蘭、花蓮、台東、高雄7天自駕親子遊]Day 4 3之2 台東大草原：初鹿牧場，與動物零距離接觸

http://tungbama.blogspot.hk/2017/07/2014-7day-4-32.html

[台東太麻里鄉酒店推介][2014 不一樣的宜蘭、花蓮、台東、高雄7天自駕親子遊]Day 4 3之3 太麻里鄉金崙「一田屋溫泉」http://tungbama.blogspot.hk/2017/07/2014-7day-4-33.html

[2014 不一樣的宜蘭、花蓮、台東、高雄7天自駕親子遊]Day 5 大武山生態教育館 & 全台最美車站-「多良車站」

http://tungbama.blogspot.hk/2017/08/2014-7day-5.html


[2014 不一樣的宜蘭、花蓮、台東、高雄7天自駕親子遊]Day 6 高雄科工館 = 科學館的究極加強版，地震體驗不要錯過
http://tungbama.blogspot.com/2018/06/blog-post.html