【日本、大阪、有馬溫泉】[2015 五日四夜跨年有馬大阪親子遊]Day1 (4之1) 30分鐘由關西空港特快去神戶方法!（內有神戶黎明）

第一日（３０／１２）
香港機場出發 > 關西空港 > 神戶高速船 > 三宮車站 > 有馬溫泉 > 住宿：陵楓閣 > 六甲有馬索道 > 六甲山滑雪場 > 六甲有馬索道 > 陵楓閣浸浴及專人服侍用餐，食神戶牛

一般旅行者去關西，離不開係大阪、奈良、京都、神戶，再遠少少就可能係白濱、和歌山或者姬路城。

因為想浸溫泉同帶瞳瞳睇雪，所以要去比較郊區既地方先可以，好彩附近有個人工滑雪場，有無落雪都無咩所謂(事實果陣真係未落雪)，起碼都可以玩下雪，所以我地揀左「有馬溫泉」。

「有馬溫泉」係邊呢? 其實佢係神戶市既後山，而「有馬溫泉」既後後山，就係「六甲山滑雪場」啦~

我地一齊出發啦!

由屋企，坐尾二尾班車既機場巴士，到機場果陣啱啱好2315，因為夜晚無咩人，巴士乘客少，交通暢順，連check in手續、過關等等都好快趣！

瞳瞳爸爸都未坐過國泰航空(CX)，呢間始終係香港本地既航空公司，呢次係第一次坐，服務就.....(唉.....算啦!)~ 香港去大阪都差唔多3.5小時航程，機上提供一個簡單的輕食，大部份人都爭取時間休息。

聖誕節version既登機門

第一次坐CX，機尾咁滯，好full呀~

凌晨機提供一個簡單的輕食

快快爭取時間休息!

好啦! 黎都呢度又講下點樣「30分鐘由關西機場特快去神戶方法」，先講下地理位置先：

關西空港　＝　香港國際機場

神戶　＝　屯門

大阪　＝　青衣

其實神戶同關西空港遙遙相對，中間隔住大阪灣，如果搭乘陸上交通，例如巴士、鐵路，就好似我地香港赤立角機場去屯門咁，首先要屈去青衣島再行汀九橋落屯門公路入屯門。所以最快既方法就係：

直　接　由　關　西　空　港　坐　高　速　船　到　神　戶

天濛光去到大阪關西機場

中間過關情況我就不贅了，入境手續、取行李、出海關之後，往右手邊方向行或者搵到下圖「高速船」的標誌，就可以搵到售票處啦！

去到售票處，有兩位職員，一位小姐坐櫃檯，另一位叔叔好熱情行出黎兜客，佢仲幫我地係售票機買飛，之後帶我地行去巴士站陪我地等車。

而家 <關西 往返 神戶> 高速船 做緊優惠，原本1850 YEN一位，遊客出示護照，只需1000 YEN就可以了！

6歲以下小朋友雖然唔駛錢，不過都要按一張「船票」出黎，因為始終計一個「人頭」。

認住高速船標誌，放心，到目前為止暫時只有去神戶的航線。

呢個就係去神戶船既售票櫃位

遊客出示護照只要1000 YEN

售票機，感謝果位叔叔職員幫我地按掣，留意右下角「幼兒用乘船劵」，免費搭乘都要按張票出黎。

大人票及幼兒票

航班資訊，今次我地搭到7:05的一班

講講程序先：買票＞巴士５分鐘＞關西空港碼頭＞高速船２０分鐘＞神戶空港碼頭＞巴士５分鐘＞神戶空港

唔知係咪時間太早呢?就我地所見，呢班車加埋我地唔夠十個人，而且佢係車駁船、船駁車咁，所以巴士一去到碼頭，船已經等緊你，唔駛碼頭乾等，所有巴士的乘客一上船，船就開架啦！無縫連接！同樣去到神戶果邊，一落船又有巴士恭侯，一上車就送到去神戶空港客運大樓。時間慳唔少！

關西空港去碼頭既接駁巴士到啦！

行李位，搭車的人唔多

5分鐘車程到碼頭了

有工作人員幫我搬行李上船同固定行李！超貼心！

船艙寬敞舒適，澳門船咁，而且好穩定

如假包換：神戶黎明

20分鐘船程，回望番我地果架舒適高速船

去到神戶，有另一架巴士在場恭侯我地

一落巴士，就係神戶空正門，行入去右轉，就會見到扶手電梯上去搭「PORT LINER」，「PORT LINER」係一個連接神戶空港同市區三宮站的架空鐵路系統，之後我地就會搭佢進入神戶市區「三宮站」啦！下一節會再詳細講解。

神戶空港既門口

PORT LINER就係由呢度上去搭車啦! 準備進入神戶市區!

有用資料: 

1. 關西空港<>神戶空港 高速船

http://www.kobe-access.jp/tc/index.php

http://www.kobe-access.jp/tc/half/index.html

延伸閱讀：

[2015大阪跨年5天親子遊] 有馬、大阪跨年行程大公開!

http://tungbama.blogspot.hk/2016/01/20155.html

[2015大阪跨年5天親子遊]Day1 (4之1) 30分鐘由關西空港特快去神戶方法!（內有神戶黎明）

http://tungbama.blogspot.hk/2016/01/20155day1-41-30.html

[2015大阪跨年5天親子遊]Day1 (4之2) 一票到底！買一張車飛由三宮站直到有馬溫泉!

http://tungbama.blogspot.hk/2016/01/20155day1-42.html

[2015大阪跨年5天親子遊]Day1 (4之3) 六甲山滑雪場的冰雪之旅

http://tungbama.blogspot.hk/2016/01/20155day1-43.html

[2015大阪跨年5天親子遊]Day1 (4之4) 有馬溫泉「陵楓閣」：體驗傳統日本溫泉旅館，專人服侍用餐，食神戶牛

http://tungbama.blogspot.hk/2016/01/20155day1-44.html

[2015大阪跨年5天親子遊]Day2 (3之1) 陵楓閣日式早餐 + 邊行邊浸腳：「有馬溫泉街」

http://tungbama.blogspot.hk/2016/01/20155day1-31.html

[2015大阪跨年5天親子遊]Day2 (3之2) 一程車就可以由有馬溫泉直達梅田 + 外出、行街極方便「新阪急酒店」

http://tungbama.blogspot.hk/2016/01/20155day2-32.html

[2015大阪跨年5天親子遊]Day2 (3之3) 梅田地下街探路之旅、有得食有得玩的扭蛋壽司、閒逛街坊超市：玉出超市、酒店睇「紅白」等跨年、2016第一個朋友之約

http://tungbama.blogspot.hk/2016/01/20155day2-33-2016.html

[2015大阪跨年5天親子遊]Day3 元旦日輕鬆行，簡易購買地下鐵1 day pass；瘋狂Shopping搶福袋 門真南<三井OUTLET PARK>+今福鶴見

http://tungbama.blogspot.hk/2016/01/20155day3-33-1-day-passshopping.html

[2015大阪跨年5天親子遊]Day4 (2之1) 勁啱一家大細去hea足半日的「天王寺動物園」(大阪市立動物園)

http://tungbama.blogspot.hk/2016/01/20155day4-21-hea.html

[2015大阪跨年5天親子遊]Day4 (2之2) 品嚐關西第一拉麵之稱的「神座拉麵」、梅田yodobashi VS 難波BIC CAMERA、扭蛋壽司再encorn、終於找到你「屎屎人」

http://tungbama.blogspot.hk/2016/01/20155day4-22-yodobashi-vs-bic.html

[2015大阪跨年5天親子遊]Day 5 Tomica shop DIY車仔工場砌巴士、梅田地下街午餐、由梅田搭Airport Limousine利木津巴士一上一落輕輕鬆鬆到關西空港、特集：「福袋」大揭秘

http://tungbama.blogspot.hk/2016/01/20155day-5-tomica-shop-diyairport.html