第二日（３１／１２）
早餐：陵楓閣及checkout > 有馬溫泉街及午餐 > 阪急高速巴士(有馬>梅田) > 住宿：新阪急酒店 > 梅田地下街 > 晚餐：無添くら寿司 天六駅前店 > 玉出超市 天神橋店 > 新阪急酒店(跨年睇紅白) > 2016首個MEETING終於黎到2015年既最後一日啦！我地都準備在大阪跨年，亦都係瞳瞳一家第一次外地跨年，心情好興奮！唔知道日本既跨年會點呢？倒數？敲鐘？煙花？
梅田，真係一個比你意想不到的大大大大大，特別係地下街，如果佢同難波相比，梅田真係複雜好多，因為梅田的地下街貫穿所有車站，另外又可以直達百貨公司的地庫層，連日本人都稱呢度做「地下迷宮」。原來當年佢地發展唔統一，所以形成今時今日既迷宮。
瞳瞳爸爸遇過以下情況：
1. 出入口號碼會出現多次，所以用號碼分出入口唔可以作準。
2. 就算同一層，例如由B2去B2，佢地有機會唔相通，可能要兜上地面或者落多地庫一層先可以過到去。
結論： 行 地 面
地下街真係咩都有，餐廳、玩具、時裝......咩都有！
我地一家大細，就去望下玩具店。KIDDY LAND就好齊全，本身佢係日本都有幾間分店，男仔女仔既玩具、精品咩都有，價錢都可以接受，雖然唔係特別平，但勝在貨品夠齊！佢佔據左地下街兩層，其中一層仲係SNOOPY主題。
呢度有間布甸狗主題的餐廳，要排隊入座，好多布甸狗fans嚟朝聖。
 |
| 布甸狗主題餐廳 |
 |
| 好大的KIDDY LAND，帶小朋友黎一定唔捨得走 |
 |
| 試玩夾公仔機，無限loop，拎下成功感 |
 |
| 好多舖頭已經準備好福袋，但未開售 |
 |
| 專門賣嬰兒用品的舖頭，衫仔都好靚 |
有得食有得玩的扭蛋壽司：「無添くら寿司」
因為今日係３１號，好多食肆、店舖都會早收，我地都要早點安排晚飯。瞳瞳爸爸一早就瞄準了「無添くら寿司」，呢間迴轉壽司台有兩個特色，一就係碟碟１００ YEN，即係港紙＄６.４，非常抵食！二就係佢有扭蛋玩，每食夠５碟就有一次抽扭蛋既機會，絕對係吸引到小朋友食多Ｄ。仲有就係全電腦自行落單，可以慢慢揀。
本來係梅田都有分店，不過上網睇過梅田分店無扭蛋玩，所以我就揀左坐地下鐵去「天六駅前店」，食完仲可以順路散步行去「玉出超市 天神橋店」Shopping！
梅田出發 ＞ 東梅田站 ＞ 地下鐵谷町線(大日方向) ＞ 天神橋筋六丁目站
之後由６號出口前往，一上地面就見到！
 |
| 無添くら寿司 天六駅前店 |
 |
| 檯面上有個綠色位置，係比你自行放碟入去，跟手電腦會計算碟數，每5碟就有一次抽獎機會 |
 |
| 如果旋轉帶訌面無野啱，可以用電腦柯打 |
 |
| 揀好數量 |
 |
| 柯打的壽司會在上面的一條運輸帶直送到你位置 |
 |
| 連拉麵都係運輸帶送過黎，不過佢包得好穩陣 |
係度特別澄清下，佢１００ YEN碟，基本上都係兩件一碟，只係因為我地太肚餓，食左先記得影相，哈哈，真係唔好意思！至於味道........你話好新鮮或者好好味就未至於，不過質素就同元Ｘ壽司差唔多，勝在抵食！有好多日本人(街坊)一家大細都會嚟食！
當你食夠５碟之後，將吉碟擺入去放碟既口(每張檯都有，在輸送帶下面)，電腦會幫你地計數，夠５碟的話就會跳到去小遊戲，不過呢個小遊戲大家係唔駛控制既，中獎只係隨機random，所以唔駛篤個螢光幕啦！多食多機會。至於扭蛋扭左D咩呢？就係呢排好HIT既妖怪手錶磁石貼 (扮妖怪徽章)，都幾得意呀！
 |
| 炸栗米粒，本身點錯左，但又出奇地好食！ |
 |
| 甜品之一，口感好似食「糖不甩」 |
 |
| 蜜瓜雪糕 |
 |
| 為左扭蛋，瞳瞳都食得多左！ |
 |
扭蛋：妖怪手錶磁石貼 |
閒逛街坊超市：玉出超市
離開「無添くら寿司」，我地就沿著「天神橋筋商店街」一直行去「玉出超市」，暑假去過既「大阪今昔生活館」都係附近，所以好熟悉。因為年末日，沿路大部份的店舖都關門，一片冷冷清清，一直行到去玉出超市，好彩有開！
「玉出超市」係大阪的地頭超市，佢係大阪市市內開左好多間，多數都係住宅區入面，所以顧客都以「街坊」為主，有部份分店仲廿四小時營業，價錢亦都比較平，除左一般日常生活用品、零食食品之外，仲有蔬菜生果同埋熟食區，連壽司炸物都有！價錢點平？以瞳瞳爸爸最愛的「可口可樂」為例，出面賣１１０ YEN，呢度賣７９ YEN咋。
 |
| 天神橋筋商店街。暑假先去完，年尾又再黎。 |
離開「玉出超市」，我地就在門口前面，正正就係「ＪＲ天滿站」，就可以搭ＪＲ返「大阪站」，坐一個站就可以返到酒店了。
酒店睇「紅白」等跨年
小時候知道日本有「紅白歌唱比賽」，一直印象都係ATV播，跨年播一次、農曆新年又會重播一次，今次我地返到酒店，靜靜地等跨年，原本打算去神社敲鐘，但瞳瞳要瞓覺，就好難陪我地去癲....
我由酒店望向街上，見不到有人群慶祝，最重要今時今日我先知「紅白」原來唔係跨年倒數，2330節目就完了。
不過，我們總算一家人一起渡過大阪新年，在酒店房間內，食下超市買返嚟既戰利品，一起渡過2015到2016！
 |
| 木村拓哉出場 |
 |
| SMAP |
 |
| 今年紅組勝 (今年也是歷來收視最低) |
 |
| 很平靜的街道，就這樣渡過我們的新年 |
 |
| 看！Yodobashi已經有人排隊，仲紮埋營，準備明天搶福袋 |
2016 朋友之約！謝謝你！
出發前，發現有位舊同學 - Mo Lin，也在大阪旅行中，就看看如何約好，大家靠Whatapps、facebook messenger聯絡上，終於佢由自已酒店「天王寺」搭元旦通宵版的地下鐵嚟「梅田」搵我。難得又比我地一間元旦都營業的咖啡店，傾下計，閒話家常，天南地北，正！
兩個在香港約唔到既人，卻在大阪梅田相遇。
 |
有用資料:
1. 梅田Whity地下街
地址：530-0018 大阪府大阪市 北区小松原町梅田地下街
2. 無添くら寿司
地址：大阪府大阪市北区天神橋7-6-11（天六駅前店）
電話：06-6354-6101
3. 玉出超市
地址：530-0041大阪市北区天神橋4丁目8-9（天神橋店）
電話：06-6355-3335
延伸閱讀：
[2015大阪跨年5天親子遊] 有馬、大阪跨年行程大公開!
[2015大阪跨年5天親子遊]Day1
(4之1) 30分鐘由關西空港特快去神戶方法!（內有神戶黎明）
[2015大阪跨年5天親子遊]Day1
(4之2) 一票到底！買一張車飛由三宮站直到有馬溫泉!
[2015大阪跨年5天親子遊]Day1
(4之3) 六甲山滑雪場的冰雪之旅
[2015大阪跨年5天親子遊]Day1
(4之4) 有馬溫泉「陵楓閣」：體驗傳統日本溫泉旅館，專人服侍用餐，食神戶牛
[2015大阪跨年5天親子遊]Day2
(3之1) 陵楓閣日式早餐 + 邊行邊浸腳：「有馬溫泉街」
[2015大阪跨年5天親子遊]Day2
(3之2) 一程車就可以由有馬溫泉直達梅田 + 外出、行街極方便「新阪急酒店」
[2015大阪跨年5天親子遊]Day2
(3之3) 梅田地下街探路之旅、有得食有得玩的扭蛋壽司、閒逛街坊超市：玉出超市、酒店睇「紅白」等跨年、2016第一個朋友之約
[2015大阪跨年5天親子遊]Day3 元旦日輕鬆行，簡易購買地下鐵1
day pass；瘋狂Shopping搶福袋 門真南<三井OUTLET
PARK>+今福鶴見
[2015大阪跨年5天親子遊]Day4
(2之1) 勁啱一家大細去hea足半日的「天王寺動物園」(大阪市立動物園)
[2015大阪跨年5天親子遊]Day4
(2之2) 品嚐關西第一拉麵之稱的「神座拉麵」、梅田yodobashi
VS 難波BIC
CAMERA、扭蛋壽司再encorn、終於找到你「屎屎人」
[2015大阪跨年5天親子遊]Day
5 Tomica shop DIY車仔工場砌巴士、梅田地下街午餐、由梅田搭Airport
Limousine利木津巴士一上一落輕輕鬆鬆到關西空港、特集：「福袋」大揭秘
沒有留言:
張貼留言