瞳遊樂 (八十後香港家庭的親子旅遊blog): 【台灣、台中、清境、台南、高雄】[Day 2] 台中、清境、台南、高雄6天親子遊(阿東窯仔雞+清境羊角村民宿)

2016年3月21日星期一

【台灣、台中、清境、台南、高雄】[Day 2] 台中、清境、台南、高雄6天親子遊(阿東窯仔雞+清境羊角村民宿)

瞳瞳@台灣中南部親子趴趴走

Day 2 台中>彰化扇形火車庫>阿東窯仔雞>清境羊角村民宿

去完彰化扇形火車廠，我地就趕係1100之前要走，準備長車程，因為我地要１小時３０分車程直上清境農場了，中途會在一個叫「阿東窯仔雞」。我地在酒店打包左少少食物比瞳瞳，以防佢肚餓，好彩瞳瞳又無扭計，而且在車上睡了一個好覺！ＺＺＺＺＺＺｚｚｚｚｚｚｚ

辛苦一帆兄把車子開上山，好多人話清境條路好危險，但其實我覺得小心一點開車就可以了。簡單講下清境段路既狀況，在初頭都係平坦的高速公路到達山腳，之後就要開始上山，上山一條落山一條，而且都幾闊下！路邊的凹陷用來去水，沒有渠蓋，但如前面所講，條路都幾闊下，只要唔攞位太盡就可以了！巴士、貨車、私家車都會用呢條路上落山，同平時一樣，留意前車距離，同小心對面線的車過火位。

當然，因為我地唔係當地人，所以我建議各位香港家庭避免夜晚上山

離開火車庫, 我地開1小時30分鐘的車, 上清境農場, 見到山的斷層, 好清楚!!

「阿東窯仔雞」

先來一個LUNCH在清境路上，食網上紅爆的「阿東窯仔雞」，好多網友推介，就在上清境的路邊。開始上山, 氣溫沒有那麼高, 所以大家坐室外也不覺得熱，店子就好似在山邊搭建的一間木屋，可以在呢侸位置欣賞風景，好靚，令人更加期待真正到達清境的風景。

窯仔雞使用傳統磚窯燒製而成，用走地雞造，旁邊有一杯雞油，店員教我地可以沾雞肉食同撈飯，我試過，真係超香而且不覺肥！順水推舟，就請店員幫我地拆雞吧，來一場「表演」。犀利！三兩下手勢，唔駛三分鐘，就把雞拆好一件件了！我地仲點左以下幾樣野食：

鹽酥河蝦：好香口，細細隻，佐酒極品！蝦的腳應該好「吉」口，但佢做到一咬便碎，連瞳瞳都食到！

清炒高麗菜：自家種，雖然落油炒，但不覺得肥，菜真的甜，可以叫多碟！（之後去左咁多次台灣，都未遇到）

山豬肉：相比之下比較失色，肥肉也較多，可以不吃～

但我地眾人一致覺得整體來說都好好味呀～

烹煮窯仔雞的磚窯，就在店家門口

對著美景嘗美食

窯仔雞上檯，旁邊有一杯雞油

鹽酥河蝦、清炒高麗菜

山豬肉

真係好好味呀！

清境羊角村民宿

食完窯仔雞，車子繼續上山，再走多大約１５分鐘左右就到「羊角村」，在沿路已見到清境農場的歐洲式建築民宿。「羊角村」要由一條小路進入，自成一角，門口有個「羊角村」招牌，一睇，原來１９２０米高！所以我地在盛夏，但都覺得好涼快！

入屋要守民宿規矩：「換鞋先！」民宿已安排好拖鞋給我們。民宿唯一辛苦地方，是沒有電梯，要步行上客房。幸好我們一早已有準備，HAND CARRY住一晚，大件行李留在車上，這也是租車的好處！清境的一般民宿沒有冷氣，起初擔心會好熱同有蚊，但竟然沒有蚊子，還有點冷。咪以為民宿設備好簡陋，浴室竟然有桑拿，房間叫「星空二人房」，我起初不明白，後來才知道，一會兒為大家揭曉。