 |
| 感謝媒體報導轉載本文：2016/9/2 |
上次住左一晚豪華Villa - "Paresa"，未來日子5晚我地就轉酒店住「Patong Beach 芭東沙灘」芭東係布吉島「最旺、最熱鬧、遊客最集中」的地方。7、8月呢個時間，其實係布吉的雨季，落雨的程度都幾犀利，直情係香港黑紅黃雨咁，但就屬「過雲雨式」：大雨＞轉細雨＞停雨＞大雨＞轉細雨＞停雨＞大雨。。。咁無限loop，我都預算可能會因為天氣惡劣而留係酒店入面，所以今次在揀酒店上我都以酒店設施同活動為考慮之一。（價錢梗係考慮之列啦，一家大細要經濟呀！）
 |
| 見到個泳池真係好大，在酒店的「核心內圍」，全芭東最大的酒店泳池啊！ |
瞳瞳一家今次揀左「Novotel Phuket Vintage Park」酒店，主要原因
係酒店由大集團管理，有信心；二來佢位置近 Jungceylon購物中心 (步行10分鐘)、芭東海灘 (步行5分鐘)；三來Novotel Phuket Vintage Park有全芭東最大的泳池酒店，啱哂我地今次玩水既目的！「今次真係游水游到盡」！
 |
| 酒店外貌，建築群都幾大 |
 |
| 酒店位置圖， Jungceylon購物中心 (步行10分鐘)、芭東海灘 (步行5分鐘) |
我地由Paresa大約坐左40分鐘的車程，就到在位於Patong Beach芭東的 "Novotel Phuket Vintage Park"，酒店中文名就譯作「布吉諾富特仿古公園酒店」。我地的私家車一到達酒店，同樣地職員會幫我地取行李，當你一步入大堂就知道點解中文會叫「仿古公園酒店」，大堂裝飾極有泰國色彩，連牆壁都有佛像雕刻，感覺就好似進入了佛教的石窟古蹟一樣。晚上，大堂仲會有位穿上泰國民族色彩的表演者演奏樂器添，增加氣氛。
Blooming Lobby Lounge
Novotel的會員入住期間，可以在Happy hour時段免費獲得一杯飲品；在晚上18:00-1900，更會免費提供小食，所以大家不妨考慮做會員。^^
(http://www.novotel.com/gb/leclub/index.shtml)
 |
| 大堂樓底好高！ |
 |
| wow.....以為置身古蹟入面 |
 |
| 晚上，大堂仲會有位穿上泰國民族色彩的表演者演奏樂器添，增加氣氛。 |
 |
| 在Blooming Lobby Lounge飲住welcome drink等房間。 |
 |
| 呢杯welcome drink好好飲！ |
 |
| 我地在用贈劵換埋飲品～ |
 |
| 在1800-1900提供的免費小食 |
房間設施篇
等左一陣，就由職員帶我地去房間，酒店由四幢樓所組成，呈一個「U」字型，中間位置就係全芭東最大的酒店泳池，有二千平方米咁大！今次瞳瞳一家住6樓，亦係酒店最高的樓層，住的是「Superior Room」，其實佢仲有一種「Pool Access Room 池邊房」，一推出門就係一個小型Jacuzzi泳池仔，泳池仔會連接上酒店主池(Main pool)，但因為呢種房的數量唔多，大受歡迎，好快就爆棚 Full Booking，我地4月果陣訂，已經無哂呢種房。泰國布吉的酒店房都非常大，酒店知道我地係3人家庭，把原本的梳化改成單人床，比瞳瞳做睡床。浴室也非常大，分別有淋浴同浴缸，中間有玻璃相隔，我覺得幾方便家長們監察到小朋友用洗手間情況，當然，也可以把浴廉落下，避免尷尬。酒店很有心思地用毛巾摺了大象放在雙人床，又摺了兔仔放在瞳瞳單人床，為行程添上趣味。
值得一讚：酒店冷氣係非常非常夠凍(雖然個人感受)，對於炎夏的泰國來講係非常重要 XP。其他的如32吋電視、WIFI、茶具、保險箱也齊全，連我地香港人的「三腳頭拖板」都有提供，雪櫃入面沒有預設汽水啤酒，咁都好，起碼唔會開錯飲，之後又要計錢，可以的話在街上買回來再雪凍。順帶一提，其實Room Service都唔貴，同餐廳的價錢一樣，不時仲會有特價或者套餐優惠，而且仲送上房間添，啱哂要照顧小朋友的家長。
房間外面有露台，露台有咩咁特別？嘩！非常重要，可以比我地一家人晾下泳衣，因為之後你會日日用酒店的泳池游水～～～～～
 |
| 歡迎我們的大象 =) |
 |
| 瞳瞳好鐘意佢地，呢幾日都保護佢地 (但我少左幾條毛巾用呢>_<) |
 |
| 浴缸、淋浴，兩樣都有！ |
 |
| 可以在床上望到洗手間，當然如果感到尷尬，可以落簾～ |
 |
| 連香港人好需要的三個頭拖板都有，手機相機夠哂位啦！ |
 |
| Room Service 做特價啊！ |
泳池篇
又要再提："Novotel Phuket Vintage Park"擁有全芭東最大的泳池酒店，成2000平方米咁大，當中有按摩池、兒童池，主池就正正位於酒店中間，所以泳池會在酒店的設施當中穿過，例如行人天橋底、餐廳旁邊等等。池邊有多張沙灘椅，正好游完水再曬太陽，毛巾要去泳池bar-「Velcet Pool Bar」度拎，毛巾是藍色的，千其唔好拎房間入面純白色的毛巾！泳池開放時間由早上0900-晚上2100，晚上泳池會有燈光，又係另一種感覺。
 |
| 圓型是兒童池 |
 |
| 晚上一景 |
 |
| Velcet Pool Bar，認住呢度係可以借毛巾。 |
 |
| 同埋下午15:00-1700係Happy hour時間，飲品買一送一，不要錯過！ |
設施篇
點解會介紹Novotel Phuket Vintage Park比大家呢？今次就講下佢內涵，如之前所講，為了應付布吉時晴時雨的天氣，酒店設施同活動係重要考慮之一。呢度有個大人同小朋友兩張活動時間表，一個星期七天有不同的活動，當中部分項目需要收費。
Kids Room位於地下，正正游泳池旁邊，Kids Room入面有職員看顧小朋友，我地住六天所見，都是同一位女職員負責，入面有各式各樣不同的玩具可以任玩，又有電視播住DISNEY CHANNEL，有時候仲有繪畫同手工時間。我地在酒店book左做SPA，就將瞳瞳安置係Kids Room度，好等我們享受一下，呢個服務真係好好。至於GYM House就係正Kids Room旁邊，基本健身設施齊備，朝早0930仲有教練齊齊做瑜伽運動。
 |
| 上面係成人時間表，小朋友的時間表在左下角 |
 |
| Kids Room同Gym house |
 |
| 圖工時間 |
 |
| 呢位就係呢幾日照顧瞳瞳的職員啦 |
「In Balance Spa」SPA及接摩篇
到泰國就梗係要試下按摩同SPA，芭東街上都有大大小小形形式式的接摩店，但原來係酒店一樣有好舒服的SPA同按摩，而且仲唔貴添！我地仲有半價優惠(視乎當時優惠而定)，即係一人價錢二人享受。入住時酒店贈送每人免費送15分鐘按摩，好正喎！覺得好舒服！隔日又追加再做90分鐘Plan，真係好舒服。「In Balance Spa」好有來頭好有份量，曾經拎過「Thailand Spa & Well-being Awards 2015」的獎項，好有保證！
去做按摩要先預約，我地安置瞳瞳去Kids Room後，骨精二人組準備出發。同樣地職員奉上茶同毛巾，細心地詢問有無健康問題，又介紹原來我地出生的星期幾係會有不同的香油作為代表，對應返身體會更加有效果。
90分鐘時間真係好舒服，我想講比外邊做4小時的來得更精華，更濃縮！按的力度同位置都好準，無得彈！下次再來布吉住Novotel Phuket Vintage Park，一定會再來按摩！
 |
| 骨精二人組 |
 |
| 出生日的星期幾，決定你用邊款精油~ |
 |
| 酒店內的SPA，房間環境絕對唔駛擔心！ |
「THE SQUARE」餐廳篇
酒店餐廳「THE SQUARE」，係我地每日用早餐的地方，先講早餐，佢特別為小朋友set左兒童高度的餐桌，小朋友可以用特別安排的兒童餐盤自己夾食物，當然，其他野食都啱小朋友同我地口味，多士、果汁、炒麵、粥、蛋糕、奄列、米片、火腿、煙肉、香腸、水果.......都應有盡有。
 |
| 小朋友到小朋友的餐桌自己夾早餐 |
晚上，「THE SQUARE」會提供自助餐，餐廳每一天都有不同的主題，有泰國風情、海鮮BBQ、亞洲風味等等，收費各有不同。好似我地今次星期三，適逢係海鮮BBQ之夜，收費就850b，大約都係$200 HKD左右。雖然叫BBQ，但唔駛自己落手落腳既，由廚師在室外幫你燒，海鮮當晚有基圍蝦、琵琶蝦、蟹等海鮮，都唔錯架，最重要乾淨衞生，啱哂部份擔心在泰國街上食物不潔，但又想食海鮮既家庭！
 |
| 睇唔出，蝦頭係勁多羔，正！ |
 |
| 帶子，好好味，但無咩外國人夾，我唔客氣啦～ |
 |
| 遇到韓國人派氣球比我地，然後佢介紹自己，佢個仔係k-pop star，即係我地遇到星爸？ |
ＦＲＩＥＮＤＳＨＩＰ ＦＯＲＥＶＥＲ
去旅行當中有不少人和你遇上，今次行程我幾驚喜，瞳瞳在Kids room入面玩的時候，夠膽同其他唔同國藉的小朋友玩，仲好快認識到新朋友添，莫非「玩具係小朋友的共同語言」？
 |
| 瞳瞳在酒店內認識的小朋友 |
整體而言，我好滿意今次Novotel Phuket Vintage Park，由服務、餐廳、設施、SPA、房間，我地真係樣樣都試過，基本上可以足不出戶，用盡酒店設施又得；想出街外面行下，附近有出名的海南雞飯Briley、一堆大排檔、7-11、Family mart就係旁邊，景點距離亦唔太遠，行幾分鐘就到亦得，兩者都可以兼顧到。
有用資料:
1. Novotel Phuket Vintage Park
電話：+66 (0) 76 38 05 55
電郵：h8099@accor.com
延伸閱讀：
2016 七日六夜泰國布吉親子遊攻略 - 準備篇
2016 七日六夜泰國布吉親子遊攻略 - 「Man哥」安排接送及活動篇
2016 七日六夜泰國布吉親子遊攻略 - 住宿篇 - 活在天堂日與夜的「Paresa Resort Phuket」
2016 七日六夜泰國布吉親子遊攻略 - 住宿篇 - 擁有全芭東最大的酒店泳池「Novotel Phuket Vintage Park」
2016 七日六夜泰國布吉親子遊攻略 - 玩樂篇 - 蛋島半日搶灘風雨團
2016 七日六夜泰國布吉親子遊攻略 - 玩樂篇 - 騎大象之旅
2016 七日六夜泰國布吉親子遊攻略 - 飲食篇
2016 七日六夜泰國布吉親子遊攻略 - 行街購物篇
2016 七日六夜泰國布吉親子遊攻略 - SO THAI SPA
Do they charge additional for putting another bed for kid? tq.
回覆刪除Gary & Peng,
回覆刪除當然可以，但記得提早向酒店預留BB床^^
瞳瞳爸爸